Brezhoneg | Français | English | Nederlands | Italiano |Español

Abalamour d’o sevenadur, d’o istor, d’o yezhoù, e vez graet pobl eus ar Vretoned hag ar Vretonezed.

Ar gwir en deus pep pobl da vezañ evel m’emañ.

Setu perak e tisklêriomp omp dizalc’hourien, a-benn d’ober war dro hon dazont, diorren hor yezhoù hag hor sevenadur ha dresañ freuz bet graet gant an drevadennouriezh gall : distruj hor sevenadur, koll hor yezhoù, sujidigezh penn da benn d’ar stad...

Fellout a ra deomp sevel hon istor-ni.

Bro-C’hall n’eus ket anezhi evel m’emañ diskouezet deomp. He  mennozhiad vroadel a stourm enep hon identelezh, daoust d’he fennderoù emañ hi diazezet warno. Bro-C’hall a zo ur raktres politikel peurunvaniñ, gwaskañ, ha kreizennañ ar barregezhioù. En em zalc’h a ra atav Bro-c’hall, e Breizh hag e lec’h all, evel ur stad trevadennus :

- En un doare ekonomikel : (pesketaerezh, labour-douar, greanterezh...)

- Sokial : (ANPE, PARE...)

- Politikel (kreizennañ ar galloudoù hag an diviz e Pariz hep kuzuliadenn lec’hel...)

- An arme  (JAPD, dasparzhadur an armeoù raktreset hervez al lec’h...)

Hag evit tout ar peurrest ivez : (dibab an energiezh, an deskadurezh...)

Setu perak omp kengred gant ar pobloù all a stourm (stourmoù sokial pe dizalc’hidigezh) ha gouzout a ouzomp ne c’hell stourm evit Breizh diveliel bezañ nemet ur stourm stag ouzh stourmoù all er bed. Setu perak e c’hell bezañ hor stourm-ni un distegner a c’hell reiñ lañs da reoù all, dreist-holl er stourmoù dishualerezh a c’hell bezañ ur mirlec’h evit cheñchamantoù sokial krenn.

Ar bobl vreizh, da heul ur bolitikerezh enep krenn d’he yezhoù, a gomz bremañ galleg en he fezh. N’omp ket neuze a-enep ar galleg, met ret eo d’ar brezhoneg ha d’ar galoeg kemer en dro o flas bet kollet ganto er gevredigezh, an deskadurezh, ar gwaskerezh... sevel a reomp a-du gant ur gevredigezh liessevenadurel lec’h ma kavo bod pep yezh, yezhoù an emvroidi en o-zouez.

Hor stourm a heul an hini bet kroget gant an emsav dishualerezh sokial, eñ bet ganet gant an dispac’h greanterezhel. Evidomp ni, ne c’hell ur stourm evit Breizh dieub bezañ distag ouzh ur stourm dieubidigezh hollvedel hag hiniennel. Met ne fell ket deomp dreistwiriañ ur stourm e-keñver unan all.

Ar stad a zo dre ret ur benveg a ya a-enep d’ar pobloù ha d’an hiniennoù.

Ne fell ket deomp lezel pezh a sell ouzhimp etre daouarn unan bennak all (dilennidi, fliked, prefedoù...) ha lezel anezho divizout evidomp-ni. Neus forzh petra e vefe : kevredigezh, ekonomiezh, darempredoù etrebroadel, ekologiezh, pe evit ar pemdez, lec’h m’emañ al lezennoù graet evit gwaskañ ha mirout ouzh pep hini divizout pezh a zo mat evitañ /ti.

Sevel a reomp a-du evit ur sistem diazezet war an dud : bodadoù kêrig, kumuniezh, strolladoù nesañded, broioù... lec’h ma c’hello pep hinienn divizout ha lec’h ma c’hello pep mennozh bezañ divizet etre an holl evit dont a-benn sevel holl a-du ha kemer e kont interestoù an holl hep bezañ strizh.

Betek-hen, an holl sistemoù omp bet rediet da c’houzañv  (kevalaouriezh, sokialouriezh broioù ar reter, demokratelezhioù dilennouriezh...) a zo bet c’hwitadennoù nemetken. Poent mat eo ijin ha sevel ur gevredigezh nevez war diazez an den hag ar stroll, ha nompas diazezet war ar gounit hag ar beli.

Breizh diveliel a zo enep krenn ar c’hevala, hag ar faskouriezh. Peogwir lezenn ar marc’had n’eo mat nemet evit un dornad tud a c’horvoiñ peurrest ar boblañs hag ivez an danvezioù naturel, emaomp a-enep krenn ar patromed hag ar adkemer binvioù produiñ gant ar re a glask sevel an emveradur, ha produiñ pezh a zo ret nemetken. Torromp ar poellad ampletusted, gant e vennozh nemeti : gounit muioc’h-mui a arc’hant bepred !

Peurunvaniezh sevenadurel ar pobloù a servij d’ar c’hontrol sokial, da gontrol ar bevenniñ. Setu an nor digor d’ar strizhder !

Evidomp-ni, an dizalc’hidigezh a dalv mot davet ar re all. N’emañ ket e-barzh sevel harzoù ha kas an “hini all” da sutal. Breizh a zo liesdoare ha liessevenadurel, hag emskiant hon eus eo a-drugarez d’ar meskaj-se ez a war-raok ar pobloù. A-enep krenn chaovinegezh emaomp, n’eus forzh peseurt furm e kemerfe anezhi. Bezañ breizhat, Breizhadez ne dalv ket dre ret bezañ bet ganet e Breizh pe kaout un anv breizhek. Brezañ breizhat, breizhadez a dalv ivez dibab kemer perzh er vuhez pemdeziek breizhek, en emluskoù hag en divizoù, bezañ er bodadegoù.

Kenurzh Breizh Dizalc’h ha Diveliel